حیدربابا، یولوم سنن کج اولدی
عمروم کچدی گلممه دیم گئج اولدی
هئچ بیلمه دیم گؤزللرون نئج اولدی
بیلمزیدیم دنگه لر وار، دؤنوم وار
ایتگین لیک وار، آیریلیق وار، اؤلوم وار
حیدر بابا سنین اوزون آغ اولسون
دورت بیریانین بولاغ اولسون باغ اولسون
بیزدن سورا سنین باشین ساغ اولسون
دونیا قضو قدر، اؤلوم ایتیمدی
دونیا بؤیی اوغولسوزدی، یتیمدی
حیدر بابا، گون دالیوی داغلاسین
اوزون گولسون، بولاخلارون آغلاسین
اوشاخلارون بیر دسته گول باغلاسین
یئل گلنده وئر گتیرسین بویانا
بلکه منیم یاتمیش بختیم اویانا
بایرام یئلی چارداخلاری ییخاندا
نوروز گولی، قار چیچکی چیخاندا
آغ بولوتلار کؤینکلرین سیخاندا
بیزدن ده بیر یاد ائلییه ن ساغ اولسون
دردلریمیز قوی دیکلسین داغ اولسون
حیدربابا، کهلیکلرون اوچاندا
کؤل دیبیندن دوشان قالخوب، قاچاندا
باخچالارون چیچکلنوب آچاندا
بیزدن ده بیر مومکون اولسا یاد ائله
آچیلمیان اؤرکلری شاد ائله
حیدر بابا، ایلدیریملر شاخاندا
سللر سولار شاقیدایوب آخاندا
قیزلار اونا صف باغلیوب باخاندا
سلام اولسون شوکتوزه ائلوزه
منیم ده بیر آدیم گلسین دیلوزه.
شهريار